Kontrobersiyal nga pulis gipusil

By: John Kevin D. Pilapil
August 13, 2014
DyAJ Power 90.3 FM News Correspondent

ORMOC CITY- Pulis nga perming ireklamo ang gipusil niadtong milabayng Domingo didto dapit sa iyang balay sa Villa Theresa, barangay San Isidro.

Apan pistola sa suspek wala makabuto sa dihang gikablit.

Ang pulis mao si PO2 Renato Mekitpikit, nadestino sa police station 3 ug kanhi sakop sa city intelligence branch (CIB).

Samtang ang suspek giila nga si Rodney Sedorida, rice retailer ug nagpuyo sa 301 barangay Masarayao lungsod sa Kananga Leyte.

Matod ni Mekitpikit nga, samtang siya nag maneho sa iyang motorsiklo nakabati siya og kablit sa pistola. Sa dihang gisusi iyang nakita ang suspek duol sa usa ka tindahan nga mition kaniya og armas.

Gikablit sa suspek ang kalibre 45 nga pistola apan swerte kay wa kini makabuto busa nikanaog pagdali ang pulis sa iyang motorsiklo ug giduol ang suspek nga niresulta sa paginilogay sa pistola.

Sa inilogay, nibuto og kaduha ang pistola ug nilampos naman si Mekitpikit sa pag ilog niini.

Nangayo og tabang si Mekipikit sa kapulisan sa station 3 aron dad-on ang suspek sa presinto.

Nakuha gikan sa suspek ang kalibre 45, magazine ug mga bala, duha ka kabhang, hunting knife ug ubang gamit.

Si Sedorida nagdumili sa paghatag sa iyang habig sa dihang gisuwayan og hinabi sa Power FM Newsteam.

Nahimong kontrobersiyal si Mekitpikit kahuman maoy gitudlo nga suspek sa nahitabong drug related ambush didto sa barangay Linao niadtong Marso 22 apan wala mopasaka og kaso ang biktima.

Sa milabayng buwan, gireklamo usab ang maong pulis nga nikulata sa usa ka 54 anyos nga lalaki nga drayber sa garbage truck sa may barangay Alegria.

Usa usab si Mekipikit sa mga pulis nga subject sa surprise drug test niadtong buwan sa Mayo apan wa kini motungha kay nagpa drug test kini sa lain.

Nagdumili naman sa paghatag og tubag ang pulis labot sa mga reklamo batok kaniya ug naghuwat lang siya kung may mopasaka og kaso.

Ang suspek nga si Sedorida gipasakaan na og kasong kalapasan sa Republic Act 10591 kun comprehensive firearms and ammunition law.