KAPIN USA KA TUIG NGA BATA, NALIGSAN

ORMOC CITY- Patay ang usa ka kapin usa ka tuig nga batang babaye kahuman kini malatayi sa usa ka dump truck didto sa purok World Vision barangay Ipil ning dakbayan niadtong alas 9:30 sa buntag sa milabayng adlaw.

Ang biktima mao si baby Zia Caitlin kinsa gibantayan sa iyang apohan niadtong tungora.

Sa imbestigasyon sa Traffic Management Section (TMS), giingon nga nidagan pagawas sa ilang balay ang bata ug nalahos kini ilawom sa niagi nga dump truck nga gimaneho ni Jovit Arique, 30, taga Sabang Bao ning dakbayan.

Wa na makalikay ang bata hinungdan nga nalatayan kini sa uwahi nga ligid sa dump truck.

Wa gilayon makabantay ang drayber hinungdan nga napdayon niya ang pag abante sa dump truck.

Matod ni SPO1 Antonio Pascual, nga gitawag nalang sa mga residente sa maong lugar ang drayber ug gipahibaw nga duna siyay naligsan nga bata.

Gidala pagdali sa iyang lalaki nga apohan ang bata ngadto sa tambalanan apan nakabsan kini sa kinabuhi.

Giingong nalipat ang apohan sa dihang nidagan ang bata pagawas sa balay.

Dugang pa ni Pascual nga, dili hubog ang drayber ug kumpleto kini sa dokumento sa iyang pagmaneho.

Nakagawas na ang drayber kahuman misumiter og affidavit of desistance ang inahan sa biktima ug nagkasabot ang matag habig nga abagahon lang sa tag iya sa dump truck nga si Francisco Tan ang gastuhan sa pagkamatay sa bata.

Matod ni P/Sinsp. Orlando Viacrusis, hepe sa TMS, nga dunay pagpabaya sa habig sa nagbantay sa bata hinungdan nga nanawagan sila sa mga ginikanan nga di basta basta pagawson ang mga bata ug dapat sirado gyod ang pultahan o gate sa panimalay.

By: JKP89/Power 90.3 FM Ormoc