ORMOC ANDAM NA SA PAG BUKAS SA KLASE; MAY KAKUWANG SA GAMIT

ORMOC CITY- Gipamahayag sa labaw sa Department of Education  (DepEd)Ormoc City Division office nga 50 pursento na nga usable ang mga classroom sa kapin 90 ka mga pampublikong tunghaan dinhi sa dakbayan.

Pasabot niini nga hingpit na nga naayo ang maong mga classroom nunot sa tabang sa nagkadaiyang mga grupo mapa international man o lokal, kini matod pa ni DepEd Division head Marissa Magan.

Alang kang Magan nga bisan og 50 pursento pa ang usable, pero makatabang na hinuon ang kadtong ubang classroom nga wa pa hingpit nga maayo.

Sama nalang sa ubang classroom kung diin temporaryong gihimong atop ang mga trapal.

Sa milabayng adlaw, gilunsad ang brigada eskwela 2014 diin matod pa ni Magan nga ubay ubay usab nga donasyon ang ilang nadawat gikan sa nagkadaiyang non-government organization diin dunay nihatag og mga pintal, G.I sheets, plywood ug uban pa.

Alang kang Magan nga di gud ingon nga igo na ang mga donasyon apan dako na kaayo kini og tabang.

Gibutyag usab ni Magan nga kapin 90 milyones nga budget gikan sa DepEed central office ang ilang gipaabot alang sa pagpaayo sa ubang mga classroom nga naguba human sa bagyong Yolanda.

Gikompirmar usab ni Magan nga kulang pa usab ang ilang mga resources karong subli nga pagbukas sa klase.

Matod pa niya, nga ila na usab gipa gahinan og budget sa lokal nga kagamhanan ning dakbayan ang kakuwang sa resources sama sa mga textbook, apan karon wa pa gihapoy replacement ang nagkuwang nga resources.

"ang mahitabo ani, sharing lang usa libro for the meantime kay wala pa may replacement, although dunay nag donate pero supplemental raman dili man gyod textbook, but atleast nakatabang gihapon". sigon pa ni Magan.

Suma pa ni Magan nga walay pagkuwang sa magtutudlo ang dakbayan, naka pundok na ang tanan og andam na sa pagbukas sa klase karong Hunyo 2.

Ang dakbayan adunay 97 ka pampublikong tunghaan, 14 ang sa sekondarya ug 83 ang elementarya ug kining tanan naka angkon og grabeng kadaut human sa bagyo.

Mapasalamaton ang DepEd Division sa mga nitabang sa paglunsad sa brigada eskwela.

By: John Kevin D. Pilapil/ Power 90.3 FM News Correspondent