1 SIKOP SA BUY-BUST OPERATION

ORMOC CITY- Usa ka buy-bust operation ang gipahigayon sa kapulisan sa Police Station 3 (PS3) pinangulohan ni P/Sinsp. Rio Tan, alas 9:40 kagabie (May 19, 2014) sa parking area sa Gaisano Riverside sa barangay Alegria ning dakbayan.

Ang suspek giila nga si Arnel Mascariñas, anaa sa hustong edad, minyo ug nagpuyo sa samang barangay.

Sumala pa ni PO2 Roland Morillo sa PS3, nga bag-o lang gipaubos sa surveillance ang suspek kahuman makadawat og impormasyon ang kapulisan bahin sa ilegal nga binuhatan sa maong suspek.

Nagpundok ang mga operatiba sa ilang estasyon ug gi plano dayun ang maong operasyon.

Nasayran nga, gi contact sa confidential agent kon asset si Mascariñas ug gisabotan nga adto lang sa parking area kay adto ra himuon ang pinalitay ug gituman naman kini sa suspek.

Nilampos ang kapulisan sa ilang operasyon kahuman masikop ang suspek nga si Mascariñas ug nakuha gikan kaniya ang duha ka pakete sa gituhoang shabu; P500 nga marked money ug lighter.

Gipadala naman sa crime laboratory ang duha ka pakete sa gituhoang shabu alang sa pagahimuon nga Qualitative ug Quantitative examination niini.

Anaa na karon nabilango sa selda sa PS3 ang suspek ug sa paghimo ning balita, giandam na ang mga papel sa pagpasaka og kaso batok sa suspek tungod sa kalapasan sa Republic Act (RA) 9165 kon Comprehensive Dangerous Drugs Act of 2002.

By: John Kevin D. Pilapil/ Power 90.3 FM News Correspondent