PIPILA KA KAWANI PLANONG TAKTAKON

ORMOC CITY- Gipadayag ni Mayor Ondo Codilla nga dunay pipila ka regular ug casual nga kawani sa lokal nga kagamhanan ning dakbayan ang plano niyang taktakon sa pwesto tungod sa mga kalapasan nga nabuhat.

Ang mayor sa dihang gipangutana sa PowerFM News Team kung pila ug kinsa ang plano nga taktakon, ang mayor nagdumili usa sa pagtubag sa pangutana.

Matod pa niya nga duna na sila karoy namonitor nga mga kawani nga wa mo buhat sa insaktong ginbuhaton.

Gani dunay uban nga mopakita lang kung tingdawat na sa sweldo ug dunay uban nga mangi inom sa oras sa trabaho.

Busa ang mayor hugtanong mibahad sa iyang mga kawani mintras sayo pa.

“ato ipakita sa katawhan nga kitang mga trabahante sa gobyerno mo trabaho ta sa insakto, kay og di mo motrabaho og insakto sa city government, ako ihangyo lang pud ninyo nga pangita nalang mo og private nga panginabuhi, kay mauwaw ko, mauwaw ta” matod sa mayor.

PHOTO: gikuha gikan sa Internet (Entrance sa New Ormoc City Hall)

Dugang pa sa mayor nga sa una pa ang bagyong Yolanda usa ka regular nga kawani ang gitaktak sa pwesto kahuman mapamatud-i nga mibuhat kini og kalapasan.

Sayo ning tuiga, gideklarar usab sa mayor ang pag umento sa suholan sa mga job order, gikan sa 200 pesos matag adlaw, mi umento kini sa 260 (minimum wage sa Eastern Visayas).

Niini, ang mayor mipahimangno sa mga kawani nga ipakita ang ilang pagka sinsero sa trabaho aron dila mauwawan sa mga magbubuhis.

“the government will not hire the person, the government will hire the performance” panapos sa Mayor.

By: John Kevin D. Pilapil/ Power 90.3 FM News Correspondent