BINULTO NGA SHABU UG MGA ARMAS, NASAKMIT

VILLABA, Leyte- Usa ka sakop sa Espinosa criminal group nga nag operate sa Northern Leyte ang nasikop sa mga operatiba sa 8th Regional Criminal Investigation and Detection Group (8RCIDG) didto sa barangay Poblacion Del Sur ning lungsod.

Ang suspek giila nga si Jerome Ignacio, 21, ulitawo ug residente sa eskina Rizal ug Lilion sa maong barangay.

Alas 8 sa gabie niadtong adlawng Domingo, dala ang search warrant nga giluwatan ni Tacloban City Regional Trial Court (RTC) branch 6 executive judge Alphinor Serrano batok sa suspek tungod sa ilegal nga paghupot og armas.

Gironda sa 8RCIDG pinangulohan ni P/Cinsp. Patrick Freddie Vano ang panimalay sa suspek ug didto nasakmit ang nagkadaiyang ebidensya.

PHOTO: Ang nagkadaiyang ebidensya nga nasakmit gikan sa suspek.

Base sa inventory, dunay 4 ka bulto sa gituhoang shabu; 12 ka gagmay niini nga pakete; 2 ka improvised lamps; 5 ka tooter; 5 ka lighter; 1 ka pipe; 1 ka plastic container nga sudlan sa na repack nga shabu; mga foil; 1 ka unit sa 9mm pistol; 2 ka magazine sa 9mm pistol; 1 ka revolver; 1 ka caliber 357; 38 ka buhing bala sa managlahi nga kalibre; 33 ka kabhang sa 9mm; 1 ka kabhang sa revolver; balisong ug brass knuckle.

Nasayran nga ang suspek dugay ng nalambigit sa big time drug trafficking ug gun running activities sa Leyte.

Gani mao kini ang giingon nga big time sa negusyo og ilegal nga drogas sa maong lungsod.

Sa iyang bahin, si P/Sinsp. Elvis Angayangay, hepe sa Northern Leyte-CIDG nga nagbase sa Ormoc niingon nga dunay posibilidad nga usa sa responsable sa nahitabong pagpamusil sa dakbayan ang suspek.

Dugang ni Angayangay nga mitug-an ang suspek nga usa ka ginganlan og Kerwin ang ilang amo.

Sa pagka karon, anaa na sa kustodiya sa 8RCIDG ang suspek ug nag atubang na kini og kasong kalapasan sa Republic Act 10591 kun Comprehensive Firearms and Ammunition Law ug Republic Act 9165 kun Comprehensive Dangerous Drugs Act. 

By: John Kevin D. Pilapil/ Power 90.3 FM News Correspondent