ORMOC MI PARTISIPAR SA BRIGADA ESKWELA 2014

ORMOC CITY- Gilunsad karong adlawa sa Department of Education (DepEd) ang ilang tinuig nga brigada eskwela o ang pag tinabangay sa mga magtutudlo, mga ginikanan, mga tinun-an ug mga nagkadaiyang ahensya sa gobyerno alang sa pagpangandam sa nagsingbot nga pag bukas sa klase sunod buwan.

Ang DepEd Division ning dakbayan mipakita og pag partisipar sa maong aktibidad diin ggipahigayon ang kick off ceremony didto sa barangay San Pablo elementary school, alas 7 pasado ganihang buntag ug gitambongan kini sa mga opisyal sa lokal nga kagamhanan, mga opisyal sa DepEd Division, kapulisan og kasundalohan ug mga magtutudlo.

PHOTO: New Ormoc City National High School sa unang adlaw sa Brigada Eskwela 2014.

Sa barangay Ipil, alas 6 pasado pa lang sa buntag, daghan na nga ginikanan ang naghuwat sa Ipil Central School.

Matod ni Elena Monsanto, grade 4 teacher nga, sa iyang obserbasyon mas daghan karon nga mga ginikanan ang nipartisipar sa Brigada Eskwela 2014 kumpara sa milabayng tuig.

Alang sa mga ginikanan nga nipartisipar nga, bisan sa ilang pag abag karon sa pagpanlimpyo sa tunghaan di gihapon ma wa sa ilaha ang kabalaka sa sitwasyon sa ilang mga anak inig sugod sa klase.

“ang amo lang kabalak-an sa among mga anak kana gyod ting uwan unya grabe sab ka lapok diri (Ipil Central School)” matod  sa usa ka ginikanan nga di gusto panganlan sa balita.

Samtang sa Lorenzo Y. Palou (LY Palou) elementary school sa barangay Bantigue, usa ka mubo nga programa ang gipahigayon diin mismong si City Councilor Mario Rodriguez, kinsa descendant ni Lorenzo Palou ang mi donar og mga pintal sa maong tunghaan.

Sa New Ormoc City National High School (NOCNHS/City High), susama sa usa ka fiesta ang pagpahigayon sa brigada eskwela diin sa entrada palang mo sugat na ang hilabihan ka daghang mga tinun-an uban sa ilang ginikanan.

Dunay gibutang nga sound system sa agianan nga gipatukaran og pulos pang disco ug naputos sa aso sa daob ang palibot nga daw dunay nag asal.

Sa iyang bahin, ang district supervisor sa district II nga si Anastacio Molato nibutyag nga hantud ning pagsugod sa brigada eskwela, upat ka classroom sa Mahayahay elementary school ang wa pa gihapoy atop.

Problema sa suplay sa tubig, mao namay nasinati sa barangay Mabini, Hugpa ug lakip na ang Mahayahay.

Gipahimug-atan ni Molato ang dakong tabang sa brigada eskwela aron masiguro nga luwas ug ganahan mo skwela ang mga bata.

Ang Brigada Eskwela adunay temang “Making Our Schools Safer” diin gisugdan karong adlawa (May 19, 2014) ug matapos karong Byernes (May 23, 2014).

Sa Hunyo 2, subli nga buksan ang klase sa mga pampublikong tunghaan. 

By: John Kevin D. Pilapil/ Power 90.3 FM News Correspondent