19 ANYOS, GISALVAGE

ORMOC CITY- Igo nalang sa paghilak ang ginikanan sa usa ka 19 anyos mga lalaki kahuman kini makit-i nga wa nay kinabuhi sa mingaw nga bahin sa barangay San Jose ning dakbayan niadtong myerkules sa buntag.

Ang biktima nga si Jerome Amper, 19, ulitawo ug nagpuyo sa sitio Laray barangay Boroc ning dakbayan, napalgan nga napuno sa samad pinusilan ang lawas, gibanganan og masking tape ang baba, tiil ug kamot.

Matod ni P/Sinsp. Raul Sarabia, hepe sa police station 2, nga lima ang samad pinusilan sa maong biktima; duha sa ulo ug tulo sa lawas.

Nasayran naman gikan sa police station 1 ning dakbayan, nga ang biktima nasikop na kaniadto tungod sa pagpangawat niini og hinabang gikan sa DSWD.

Si Sarabia niingon nga blangko pa sila karon kung unsa gyod ang matuod nga tinubdan kung nganong gikutloan sa iyang kinabuhi ang biktima.

Way nakuhang testigo ang kapulisan nunot sa ka mingaw sa maong lugar nga gilabayan sa biktima.

Gikondena naman sa katawhan ang nahitabong pag salvage sa mga batan-on ning dakbayan ug ingon man sa kwatro distrito sa leyte.

Sa milabayng tuig, ubay ubay na ang nabiktima og sagad niini ang dunay mga di maayong record sa kapulisan, sama sa mga drug user, suspek sa pangawat ug uban pa.

Alang sa mga Ormocanon, nga moabot gyod ang panahon nga mamahimong normal na nga hitabo nga pagsalvage butang nga ilang gikahadlokan hilabi na kay hantud karon blangko pa ang kapulisan kung kinsay mihimo sa mga pagpatay.

By: John Kevin D. Pilapil/ Power 90.3 FM News Correspondent