KABAHO SA ROSAL; GIREKLAMO

ORMOC CITY- Nakamugna og perwesyo sa mga residente sa Purok Rosal Barangay Cogon ning dakbayan ang grabeng kabaho nga ilang nasinati tungod sa gituhoang nadunot nga poultry feeds nga gitambak sa ilang lugar gahapong adlawa (May 20, 2014).

PHOTO: Gilangaw ang tulo ka hot-ong sa gituhoang nadunot nga poultry feeds nga gitambak sa Purok Rosal pipila ka metros ang distansya gikan sa New Ormoc City Hall. JKDP

Tungod niini, usa ka concerned citizen ang nipadangat sa iyang reklamo sa Power 90. FM niining ilang nasinati karon sa ilang lugar. Gibisita sa Power FM News Team ang maong lugar ug mismo ang tigbalita nakasingo sa kabaho nga daw "hang sa tilaok".

Alang sa maong concerned citizen nga nahinabi sa Power FM News Team nga, posibling usa kini sa lakang sa lokal nga kagamhanan ning dakbayan aron mapugos sila sa paghawa sa yuta nga gitukoran sa ilang panimalay nga giangkon nga iya sa kagamhanan.

Ang concerned citizen niingon nga dumptruck gikan sa lokal nga kagamhanan ning dakbayan ang gigamit paghakot ug nakuhaan pa kini og plate number.

"ako giingnan (driver) nga unsa man na inyong gitambak diri nga pwerte mang bahoa, unsa man inyong gusto diri nga ang mga taw inyong patyon sa baho, mas maayo pa hinuon nga tibway mahawa mi dinhi, boboan ninyo og makahilo aron tibway kinarusa ang patay ngadto sa menteryo" matod sa Concerned Citizen.

Gawas sa maong concerned citizen, laing pamilya usab ang nipadangat sa ilang reklamo nga matod pa, perwesyo sa ilaha ang kabaho hilabi na inig pangaon nila.

Ang mga motorista nga miagi sa lugar, nag iyahay sa pagsagpong sa ilang mga ilong ingon man usab ang mga taw nga nagtambay dapit sa gitambakan.

Gisusi sa Power FM News Team ang General Services Department (GSD) ug didto nasayran nga iya gyod sa kagamhanan ang dumptruck nga naghakot base sa plate number nga nakuha, ang maong dumptruck anaa ubos sa pagdumala sa City Engineering Office (CEO).

PHOTO: Database sa GSD nga nagpamatuod nga naa sa CEO ang dumptruck; gitago lang usa ang pangan gumikan kay wa pa mahibaw-i kung kinsa ang nag gamit niini gahapon. JKDP

Gibista sa Power FM News Team ang CEO, apan wala sa iyang opisina si City Engineer Ranulfo Oliveros busa si Engr. Virgie Matuguina ang naatubang sa tigbalita.

Matod ni Matuguina nga, wa siya masayud kung diin gikan ang gitambak sa Purok Rosal kay sa iyang nahibaw-an nga kung mag back filing sila, ngadto sila magkuha sa Panilahan.

Gisusi pa usab ni Matuguina kung kinsa ang driver sa dumptruck nga gitudlo nga maoy gigamit paghakot.

Si Marieta Legaspi, labaw sa City Social Welfare and Development (CSWD) niingon nga wa siyay ideya kung pila ka pamilya ang nagpabilin karon sa Purok Rosal nga wa gihapon mibalhin sa mga bunkhouse didto sa Barnagay Concepcion ug Can-untog.

Subli nga giklaro sa CSWD nga, wala silay gihimo nga demolition sa mga panimalay sa maong lugar kundi kabubut-on lang sa mga residente niini kung mamahawa sa ilang panimalay.

"basta ang dili mamahawa diha dili gyod sila maka avail niadtong permanent relocation didto sa barangay Liloan nga 50 hektarya" matod ni Legaspi.

Apan ang mga residente, taliwala sa kabaho, di gihapon mamahawa gumikan kay gusto nila nga i-dritso nalang sila sa permanent relocation ug dili na mo agi sa bunkhouse.

"mag antos lang mi diri, total mawala raman na madugay ng kabaho ba" matod sa concerned citizen.

Ang kagamhanan nipadala na og suwat sa mga residente kaniadto nga papahawaon na gumikan kay buot sa kagamhanan nga limpyuhon ang area.

Suma pa ni Mayor Edward Codilla nga, plano sa kagamhanan nga tukoran kini og mga edepisyo nga pwede paabangan aron dugang income na usab sa dakbayan. 

By: John Kevin D. Pilapil/ Power 90.3 FM News Correspondent