TAMBULILID SHOOTOUT; PULIS MAOY NAKAPUSIL KANG Dr. MOVILLA

(EXCLUSIVE)

ORMOC CITY- Migawas sa resulta sa ballistic examination sa Camp Crame nga usa sa napulo ka pulis nga nalambigit sa shootout sa barangay Tambulilid ang nakapusil patay sa dentistang si Jay Movilla.

Ang resulta migawas niadtong Lunes sa milabayng semana diin nakadawat og kopya ang Northern Leyte Criminal Investigation and Detection Group (NL-CIDG).

Matod ni P/Sinsp. Elvis Angayangay, hepe sa NL-CIDG nga, sa ilang pagsusi sa buhatan ni Ormoc City Police Office director Jose Macanas, ilang nasayran nga ang serial number sa pistola nga gigikanan sa slug nga gi ballistic nitugma sa serial number sa pistola sa service firearm sa usa pulis.

Kalibre .9mm ang maong service firearm.

Si Angayangay niingon sa Power FM News nga di lang usa panganlan ang maong pulis alang sa security reasons.

"Naa na ang dokumento, pulis ang nakaigo atong doktor" gikompirmar ni Angayangay.

Gawas kang Movilla, nakakuha usab og slug ang kapulisan gikan sa mga samdan nga sila si Rodolfo Villar ug Gonzalo Mendaros apan ang kang Movilla lang ang nagpositibo nga gikan sa pulis.

Gikaistorya na ni Angayangay ang kabanay ni Movilla apan niingon kini nga mo kunsulta pa sa abugado alang sa pagpasaka og kasong kriminal.

"Wala pa usab ma file ang administrative case batok ani nga pulis" pasabot ni Angayangay.

Pipila ka semana human sa nahitabong shootout, pito ka pulis ang nagpositibo sa paraffin test ug negatibo naman ang laing tulo nga sila si P/Cinsp. Edgardo Encina; P/Sinsp. Harris Rebato ug SPO1 Benedicto Cabelto.

Ang nahisgutang mga pulis naa karon sa kustodiya sa Police Regional Office 8 human gipangrelibohan aron di ma impluwensyahan ang imbestigasyon.

Niadtong buwan sa Abril, nisampot sa shootout ang untay buy-bust operation kahuman misukol ang suspek nga si Sim Serrano nga mihimo pagpamusil sud sa ilegal nga sabongan.

Patay si Serrano lakip na ang kawani sa lokal nga kagamhanan ning dakbayan nga si Wilfredo Alberto ug si Movilla samtang unom naman ang naitala nga samdan. 

By: John Kevin D. Pilapil/ Power 90.3 FM News Correspondent