CEO NANGAYO OG PASAYLO

ORMOC CITY- City Engineer Ranulfo Oliveros, nangayo og pasaylo ngadto sa mga residente sa Purok Rosal sa Barangay Cogon ning dakbayan tungod sa sayop nga pagtambak niadtong mga nadunot nga poultry feeds nga nakamugna og kabaho sa lugar.

Matod ni Oliveros nga, wa siya mag sugo sa iyang mga sakop nga adto itambak ang mga nangadaot nga feeds apan isip labaw sa City Engineering Office (CEO) siya nalang ang nangayo og despensa sa mga nahitungdan.

Mipatawag dayun si Oliveros og usa ka emergency meeting sa iyang mga sakop sa iyang pagkabati sa reklamo diin apil sa iyang gipatawag si Jonas Sorote sa operation nga maoy iyang gitahasan sa pagkuha niadtong mga nangadaot ug sunog nga feeds ug mga kahoy gikan niadtong mga tindahan sa Burgos corner Real Sts. nga nasunog niadtong Pebrero 25 ning tuiga.

“nasubay nako nga ang operation nga nagdala wa siya ka kuan nga baho diay, sunod akong gipatawag ang mga drivers kung kamo makita ninyo kay dugay naman ta sa serbisyo ato ning ilabay sa saktong dapit, dili ni ingon nga intended nga anha namo ilabay, tingali nasayup lang siguro, so being a head sa city engineering, mohatag lang pud ko og apologize nga kung kinsa to ang nahitungdan mangayo lang ko og sorry, kay di man nato ma perfect kay naa may usahay masayop ang desisyon nila, dili na desisyon sa opisina” pasabot ni Oliveros.

Ang mga residente sa Purok Rosal gipadad-an na og notice sa kagamhanan nga papahawaon na kay gamiton na sa kagamhanan ang yuta nga gitukoran sa mga panimalay.

Giakusahan sa usa ka concerned citizen ang kagamhanan nga ang pagtambak og baho posibling usa sa mga lakang sa kagamhanan aron mapugos sila sa pagpahawa.

Apan si Oliveros niingon nga i-agi nila sa due process ang tanan ug dili sa ingon ani nga paagi.

“dugay naman na sila gipahawa, ang uban ana nila duna nay yuta sa urban poor” matod ni Oliveros.

Gipatabonan na sa CEO ug yuta ang gitambak nga nangadaot nga feeds ug kung mo alisngaw pa ang baho niini, ila na kining ilabay ngadto sa landfill.

Human sa bagyong Yolanda, ang mga residente sa Purok Rosa lug Dahlia maoy prayoridad sa kagamhanan niadtong mga bunkhouse sa Barangay Can-untog ug Concepcion ug human sa unom ka buwan pabalhinon na kini sila sa permanent relocation sa barangay Liloan nga dunay sukod nga 50 hektarya.

Ang City Social Welfare Development Office niingon nga ang dili mamalhin ngadto sa bunkhouse dili maka avail sa permanent relocation.

Apan ang mga residente nga naa pa karon sa Rosal, di gihapon mobalhin bisan og tambakan pa kini og mga baho kay buot nila i-dritso nalang sila sa Liloan ug dili na moagi sa bunkhouse.

By: John Kevin D. Pilapil/Power 90.3 FM News Correspondent