HEPE SA TANOD SIKOP

ORMOC CITY- Nasikop sa mga operatiba sa Northern Leyte Criminal Investigation and Detection Group (NLCIDG) nga nagbase diri sa dakbayan ang usa ka hepe sa barangay tanod sa brgy. Mahayag lungsod sa Merida Leyte gahapon sa alas 7 sa buntag  tungod sa ilegal nga paghupot niini og armas.

Ang suspek giila nga si Restito Morera, 41, minyo ug nagpuyo sa samang barangay kinsa giigong tighimo ug tig-ayo og mga armas.

Matod ni P/Sinsp. Elvis Angayangay, sa NLCIDG nga magduha na kabuwan nga nakadawat sila og report batok sa ilegal nga binuhatan sa suspek.

Busa ang NLCIDG nag apply dayun og search warrant ngadto sa Regional Trial Court sa Tacloban batok kang Morera.

Niadtong tungora, ang mga operatiba nagpakaron ingnon nga mag pa vulcate kay duna may vulcanizing shop ang suspek busa pagkakita sa mga operatiba kang Morera, dali kini nga gisikop.

PHOTO: Nagkadaiyang kalibre sa armas ug mga bala ang nakuha gikan sa suspek nga si Morera.

Wa hinuon mosuway og sukol ug ingon man pag eskapo ang suspek.

Matod sa suspek nga, kapin usa ka tuig na siya sa maong trabaho nga gisundog niya sa iyang maguwang nga mao usab ang iyang gituhoan nga nipadakop kaniya

"Nasuko man siya kay dili naman ngadto sa iya magpaayo iyang mga customer, ari naman nako" matod sa suspek.

Sa paghimo ning balita, gihan-ay na sa NLCIDG ang mga dokumento alang sa pagpasaka og kasong kalapasan sa Republic Act 10591 kon Comprehensive Law on Firearms and Ammunition. 

By: John Kevin D. Pilapil/Power 90.3 FM News Correspondent