Si Engr. Raul Santos, kanhi structural engineer nga gitahasan sa administrasyon ni kanhi mayor Eric Codilla sa pag disenyo sa gitukod nga city hospital nga nahimutang sa barangay San Pablo ang nipadala og suwat sa buhatan ni mayor Edward Codilla labot sa iyang kasagmuyo sa dihang iyang nakita nga wa masunod ang iyang disenyo.
Base sa suwat, human sa bagyong Yolanda nahugmak ang atop dayong sud sa maong tambalanan, busa nihimo og inspeksyon si Santos sa maong tambalanan ug dako niyang kakurat sa dihang iyang nakita nga wala ang presensya sa unom ka corbels sa atop nga iyang gi disenyo.
Ang corbels mao unta ang mag suportar sa atop dayong sud sa maong tambalan ug gitumbok ni Santos nga tungod sa wa ma insaktong implementasyon sa naaprobahan nga plano ang tinubdan sa pagkahugno sa atop.
Ganihang buntag (May 12,2014), mipatawag og meeting ang oversight committee sa konseho ning dakbayan diin gitambongan kini sa mga membro sa technical working group (TWG); mga konsehales ug ni Santos.
Matod ni Engr. Virgie Matuguina sa TWG, nga wa silay nadawat nga detalye sa ibutang nga corbels sa maong atop.
Nipataas usab sa tingog Engr. Raul Cam sa TWG atubangan ni Santos atol sa meeting diin gipunto naman ni Cam ang responsibilidad sa usa ka structural engineer, suma pa ni Cam nga dapat naa unta permi si Santos niadtong pagtukod.
Nangayo naman og pasaylo si Cam.
Nikalma ang duha sa dihang mi sapaw na ang pango sa oversight committee nga si city councilor Vince Rama kinsa nipahimangno sa mga nitambong nga ipakita ang pagka propesyonal sa meeting.
Matod ni Rama, nga ilang nasuta sa maong meeting nga kuwang sa komunikasyon ang TWG ug si Santos sa maong katukoran hinungdan sa pagtumaw sa maong problema.
Wa pa hinuoy gibutyag si Rama kung kinsa ang angay manubag sa maong problema.
“nakita karon sa oversight committee nga murag nagtud-tod naman ni sila karon, pero ang rason nga nakita nato, gibutang didto kay ang ila kunong structural engineer during that time dugay ma contact, so di naman sila kahuwat ,ila nalang gibutangan og ilang kaugalingon nga improvement, which was i think dili necessary mistake but ang bottom lime niana nga we should wait and consult the proper person”. pasabot ni Rama.
Si Rama gikatakda usab nga mohimo og rekomendasyon sa nahitabong meeting ngadto sa konseho.
