PERFORMANCE RATING GIKWESTYON SA HR

ORMOC CITY- Ipang balik sa city human resources department (HRD) ang 24 ka mga performance evaluation form sa mga kawani ngadto sa duha ka sangang buhatan sa lokal nga kagamhanan ning dakbayan.

Kini kahuman makit-i ni human resources officer Adelaida Biaculo ang kwestyonable nga trabahuon sa usa ka kawani sa city veteranary department nga gibutang sa performance rating form.

Base sa maong dukomento, usa ka Admin Aide 1 sa maong buhatan ang nibutang nga usa siya ka tig isyu og shipping permit butang nga nakapakugang kang Biaculo.

Gawas niini, gibutang usab sa maong kawani nga mihimo usab siya sa pagpreparar og payroll sa mga regular nga mga kawani.

"Nakurat lage ko nga siya may mo isyu og shipping permit nga ila man unta ng head dapat, siguro igo lang siya mo preparar, unya nahibong ko nganong siya may mo preparar sa payroll sa mga regular employee nga trabaho man na namo sa HR, so mao na nga amo usa ibalik unya among klaruhon" matod ni Biaculo.

Samtang ang performance rating form gikan sa market division, dunay uban ang way mga grado ug approval hinungdan nga ipabalik kini sa maong buhatan.

Ang mga performance rating form mao ang gikan sa Hulyo ngadto sa Desyembre sa milabayng tuig.

Dugang pa ni Biaculo nga tungod ning nahitabong pagpauli sa mga form malangay gyod ang pag release sa productivity incentive sa mga kawani ning nahisgutang opisina.

"Giusa raman gud ni namo og payroll ang productivity incentive, mao na nga kung sa siyam ka kawani unya dunay sayop ang tulo nila sa ilang form, madamay gyod ang kadtong unom nga ok na, di man pwede ma tagi-tagi" pasabot ni Biaculo.

Sigon pa ni Biaculo nga, kung dunay mo insister sa iyang pag kwestyon, panahon na nga ipaabot na kini sa Performance Evaluation Review Committee (PERC)mug ipatawag ang labaw sa nahitungdan nga buhatan.

Sa pagka karon, upat na ka set sa performance rating form ang gihuptan sa HRD, dunay gikan ss Sangguniang panglunsod, City Agriculture, Market Division ug City Veterenary office.

Ang performance rating maoy rekisito nga isumiter ngadto sa HRD aron mahatagan sa productivity incentive ang usa ka casual ug regular nga kawani.

By: JKP89/Power 90.3 FM Ormoc