DUHA PATAY SA PAGPAMUSIL

(UPDATED) ORMOC CITY- Duha ang patay sa nahitabong pagpamusil sa Toog Highway Barangay Dona Feliza Mejia ning dakbayan kagahapon.

Ang mga biktima mao sila si Joel Calle Gucela, 25, dunay kapuyo ug anak, taga barangay Cogon Baybay City samtang ang laing biktima giila nga si Reynaldo Arevalo, anaa sa hustong edad, taga Simangan barangay San Pablo ning dakbayan.

Si Gucela nag trabaho isip caretaker ug manghimoay og hollow block nga gipanag-iya sa usa ka pulis nga si SPO2 Boy Datahan samtang si Arevalo nanag-iya og vulcanizing shop tupad sa gitrabahoan ni Gucela.

Matod sa kapuyo ni Gucela nga si Shaoyin kinsa nagkugos sa ilang 2 anyos nga anak nga natulog niadtong tungora nga, pasado alas 5 sa hapon, duha ka mga batan-on ang niduol ug nangutana kung tagpila ang hollow block.

“wa na ko kabantay kay mao nalay akong nabatian nga nagbuto buto na, mao to nihupo nako kugos akong anak” matod sa kapuyo.

Base sa spot report, gipusil usab sa mag mamumuno si Shaoyin apan swerte lang kay wala kini maigo.

Ang duha ka batan-on gibana bana nga anaa sa 20 ngadto sa 25 ang edad, pulos nag kalo og pangbata ug dali nga nisakay og puwa nga single nga motorsiklo human sa hitabo.

Sumala sa taga Scene of the Crime Operatives (SOCO) nga anaa sa 22 ka kabhang, 3 ka slug ug 1 ka deformed slug sa kalibre .45 ang ilang na rekober.

PHOTO: Patayng lawas ni Arevalo diin duol ra usab niini ang laing biktima nga si Gucela.

Si P/Sinsp. Rio Tan, hepe sa Police Station 3 niingon nga, blangko pa gihapon sila sa motibo sa pagpamusil.

“Unofficial lang ni, nga ang kadtong pulis nga amo aning biktima (Gucela) diri to sa una pa ang hitabo, posibli nga kadto maoy target” matod ni Tan.

Dugang ni Shaoyin, nga wa gyuy nagdumot o kaaway ang iyang kapuyo nga si Gucela ug usa kini ka buotan nga taw, samtang si Arevalo nahibaw-an nga nagpabuto kini sa iyang pistola atol sa pista sa barangay San Pablo niadtong petsa 15 ug nanghagit kini og away.

Nasayran nga alas 3 sa hapon kagahapon, nag inom ang duha ka biktima ug si Datahan didto sa factory ug pagka alas 5 sa hapon, nilakaw si Datahan pingon sa syudad ug taud taud lang nangabot ang duha ka batan-on.

Sa paghimo ning balita, padayon pa ang gihimong imbestigasyon sa kapulisan. 

By: John Kevin D. Pilapil/ Power 90.3 FM News Correspondent